吳業坤拉隊食好西為粒燒賣嬲爆宇宙

吳業坤成為《我和星星有個約會》重頭嘉賓，為幫孝順女粉絲Wincy圓心願，親自教她彈結他唱《陽光點的歌》，準備為6月生日的媽咪慶生送驚喜。教彈結他前，他先「007」上身，帶Wincy及其餘五位「觀星團」殺入大角咀豪食地道「好西」，負責在茶餐廳門口叫外賣：「要三份奶油西多，三份奶醬多，再要六杯凍奶茶，走甜。」等外賣期間，坤坤被Fans讚其「眉上蔭」新Look好型，不過略嫌真人過瘦，可是他仍指「減肥革命」尚未成功，頻說：「我好腩肥！」

撩外賣阿姐忘畀錢

吹完一輪水，外賣阿姐送上兩大包「好西」，口窒窒地讚他：「你仲靚……靚過……」坤坤見她食「螺絲」就幫口說：「上鏡呀？梗係，你都係啦……」阿姐再讚：「又高大、又威猛……」他口花花問：「鍾唔鍾意？」阿姐即直豎拇指話：「一流！」期間又情挑阿姐：「鍾唔鍾意我先？我鍾意啲姐姐。」被氹到七分見暈的阿姐，仍然有三分醒，追住他問：「邊個畀錢？」原來坤坤掛住撩女忘了「找數」，場面超搞笑。

吳業坤率歌迷掃街，邊飲奶茶，邊擦奶油西多。

Wincy拜坤坤為師學結他。

食完「好西」，他再提議到街口的小食檔買炸燒賣：「去食燒賣好唔好？」有Fans斗膽潑冷水：「吓，燒賣咁Cheap……」至愛燒賣的「尊嚴」被踐踏，坤坤邊黑面邊暴走說：「有咩理由燒賣Cheap呢？燒賣係陪伴我成長，一個好好食嘅美食，佢哋真係唔識嘢，唉……嬲呀，自己買嚟食。」被嚇到O嘴的Fans即時追住坤坤「撲火」，他才笑稱只是扮嬲：「我係咪好演技呢？」不過Fans亦說只是扮嫌棄「玩」他。見他鯨吞三粒炸燒賣，一時話「好好食」，一時又自責說：「對唔住健身教練。」為演唱會要速瘦的他，充滿罪疚感。

自創撳Chord口訣

食飽的Wincy充滿力量，即到通利琴行上堂，坤坤先教她最基本Chord指法：「係落樓梯咁落。」再邊彈邊唱內地歌后那英經典作《夢一場》作示範，可是Wincy話撳到手指抽筋，他搞笑地安撫說：「係有抽筋成分嘅。」還腦筋急轉彎，唱出自創的撳Chord「口訣歌」：「CCC，BBB A Major，加個G跟住F……」方便她記要點，經過個半小時訓練，坤坤自言已將畢生絕學傳授，而學滿師的Wincy說：「我識晒啦！」最後兩人擊掌互勉。

粉絲的話

你好，我叫Wincy，睇到《我和星星有個約會》節目可以幫粉絲如願，我希望你哋安排到吳業坤教我彈結他，因為我媽咪係坤坤Fans，佢3個月後就開生日會，我想喺生日會度自彈自唱坤坤嗰首《陽光點的歌》畀媽咪聽，當生日禮物送驚喜。

吳業坤	要健身的坤坤瞞住教練偷食。

媽咪鍾意咗坤坤好耐㗎喇，話佢人又靚仔，唱歌好聽又孝順，其實我同媽咪一樣都好鍾意坤坤，嚟緊4月佢又開紅館演唱會啦，我同媽咪一定會買飛捧場。

Wincy上