江碧蕙回饋運動員百萬搞健康食品

前女騎師江碧蕙（Sherie）與法籍網球教練老公Jerome近期榮升老闆，投資7位數字開天然健康食品公司，她透露兩人從未做過生意，今次可謂盡地一煲：「我哋有個合作夥伴，佢做咗好多年，問我哋有冇興趣，突然要我哋接觸生意，我哋唔識去做，後來了解多咗，知道係天然營養補給品，覺得有興趣，因為我平時都食好多維他命。早年我腎組織有事，開始接觸維他命，當時要食類固醇，要食好多補鈣嘅維他命，又要食魚油。我同老公都係運動員出身，最大動力係想幫到運動員，因我做運動員時冇人教我點樣食補給品，自己身體缺乏啲咩又唔知，依家我哋會用佢哋嘅血液同口水去驗佢哋欠啲咩，咁會更全面同個人化。」Sherie日前更邀請法國網球公開賽少年組冠軍Geoffrey Blancaneaux來港擔任產品大使。