麥兆輝三顧草廬邀合作 張家輝請飲「廉記咖啡」
藝人張家輝與導演麥兆輝原來曾經歷不少錯摸，麥兆輝坦言先後3次找對方合作，可惜前兩次因種種原因未能成事，直至開拍英皇電影《廉政風雲 煙幕》，老闆楊受成向他表示：「我覺得有個演員你可以合作吓，佢就係張家輝。」麥兆輝覺得張家輝很適合角色，「三顧草廬」後成功結片緣。
麥兆輝說：「我同人講要同家輝合作，有行內人即刻話佢麻煩！好記得當日約喺酒店coffee shop，當時我以為傾吓偈，點知佢成個劇本貼晒memo紙，做好晒功課，佢仲不斷問我問題，搞到我好似去咗廉署飲咖啡咁。」
讚袁詠儀演出精彩
問到是否覺得家輝如傳聞般麻煩？麥兆輝說：「唔係，我見過真正麻煩嘅演員，會同你講出埠拍攝時，酒店房冧巴要靚、要向南，呢啲先係真正嘅麻煩。」
提起袁詠儀於《廉》片的表現，他讚不絕口：「我以前做副導演時同佢合作過一次咋，不過今次感覺好唔同，坦白講佢雖然只係客串，對白冗長兼『翹口』，但佢竟然可以將啲台詞邏輯合理化，絕對係演員嘅功力，佢駕馭得好好，嗰場戲我覺得好精彩、好好睇。」