食髓知味無限回魂 周星馳識你老鼠印腳數銀紙

嗱，就講掛上「周星馳作品」五隻大字嗰套賀歲片吖，當日預告片一出街就被全城鬧爆，大彈啲笑料熟口熟面，喪插星爺又趁賀歲檔出嚟炒冷飯、搵飯食，就算佢老哥絞盡腦汁，孖埋啱啱添丁又發財嘅張栢芝站台宣傳，又失驚無神同班電競選手chit chat谷戲，充分展現佢嘅無厘頭諗頭源源不絕，偏偏就硬係唔用嚟演戲，真係失敗中嘅失敗。雖然套戲上映後都有人畀八十分，但係彈嘅人亦唔少，有啲話「伏味濃」，有啲直頭狠批「周星馳已經玩完」，呢啲就叫愛之深，恨之切嘞。

演員費慳一大筆

係人都知，一班星迷最想睇到嘅係星爺自己走番轉，返出嚟演戲，而唔係匿喺幕後督師，搵班騎呢怪以「周星馳化」嘅方式嚟演繹，然後拍完套戲，佢老哥就聲演幾句、客串片尾彩蛋，或者上畫前不斷回魂亮相宣傳活動就算數。問你吖，點解電視台重播N次《家有囍事》，星迷睇到常歡個白頭嚤囉扮相，依然笑到碌地？因為周星馳係一個演員，唔係乜鬼嘢導演、監製囉！

不過呢，星迷想睇到星爺親自出馬就難過登天嘞！事關佢用埋一大班「識你老鼠」嘅演員，都照樣大收旺場。當年用林允取代舒淇做主角拍西遊故事，演員費慳番一大筆，今年食髓知味再玩鋪勁，除咗王寶強叫做勉強噏得出名外，其餘塵世中嘅迷途小演員名字都屬「一百萬題目」，片酬幾多都心照，絕對算到盡，賺到笑呀！若然星爺自己上陣，演員費都去咗一大截，票房要多幾個Double至可以好似依家咁印印腳數銀紙呀？

攬實擔正賣座光環

何況，星爺十幾年前適值壯年就已經頭髮斑白，到家陣一把年紀既冇女友更冇朋友，慶幸一條溝唔到女嘅可憐蟲，叫做仲保住昔日擔正多齣賣座作品嘅光環，可以畀自己同星迷無限眷戀。若果要星爺喺被評為失手之作嘅《長江7號》之後，闊別十幾年貿貿然重登大銀幕，得米就話啫，萬一又再跣腳點算先？壓力之大，真係擔心佢好似前欄王劉翔咁會腳痛囉！

其實星爺選擇紅顏知己，可以由性感朱茵去到型格莫文蔚，口味好比由依家去到宇宙滅亡咁遼闊，不過，別人笑佢太花弗，佢笑他人看不穿。正如佢喺新片教大家「查理理論」：「你有幾隻眼睛？Bill Gates有幾隻眼睛？點解佢得，你會唔得？做人要相信自己。」係囉，朱茵同莫文蔚都係兩隻眼睛，星爺同看更又係兩隻眼睛，點解過年嗰陣看更可以走出更亭同住客拜年，星爺仲要匿喺自己嘅comfort zone呢？

Nuts哥