陳凱琳爆嘉穎爭住湊仔

生B近半個月正坐月的無綫花旦陳凱琳，昨日在銅鑼灣出席餅店開張活動，除了身材沒走樣，四肢依然纖瘦，餵人奶的她上圍更升至D Cup，她說：「好開心，每朝見到BB，十月懷胎都覺得係值得。」問她未坐完月就出來工作，可擔心被指為賺錢？Grace說：「唔係為錢，自己衡量過，人哋點講唔理。呢兩星期都好乖喺屋企坐月，自己貪玩出嚟同大家見吓面，報個平安。」

「承悅」情人節出世

她透露兒子在情人節開刀出世，沒有特別擇日，只在預產期之內：「嘉穎有陪我入產房見證，佢負責剪臍帶，佢唔驚，仲好興奮，我第一次生BB就有少少緊張。」至於兒子的中文名「鄭承悅」由外公改，希望他一世開心喜悅，而英文名「Rafael」與網球手拿度相同，亦有受主耶穌守護的意思。

提到上圍明顯升Cup，Grace尷尬地說：「冇計過，依家餵緊人奶，冇諗咁多，最緊要係BB可以吸收到充足嘅營養。（要換晒啲內衣？）呢啲自己處理啦。（生完之後肥咗幾多？）佗BB時肥咗20磅，依家冇上磅，唔會緊張磅數。（嘉穎有咩獎勵？）佢成日問我想要啲咩，但我覺得生BB大家都有付出，佢都減少工作陪緊我坐月。 」

唔捨得囝囝咁快大

Grace又爆嘉穎看着兒子時，父愛便湧出來，還爭住幫BB沖涼、換片及餵奶，笑言不會呷醋：「見佢咁錫個仔都好開心。（有咩期望？）可能大家都會話想佢快高長大，自己就唔捨得佢咁快大，佢實在太得意，好似Daddy，所以嘉穎望住佢好有親切感。（再生？）冇咁快，照顧好佢先。」對於網民質疑她是奉子成婚，Grace說：「入得呢行都明白外面會有啲說話，但係自己知自己事，總之BB出世係足月嘅，出世嗰陣六磅幾重。」