江嘉敏遇熱情「飛來蜢」速閃

早前江嘉敏孖劉穎鏇到土耳其拍攝旅遊節目《3日2夜》，實行寓工作於娛樂。兩人在當地逗留十四天，遊覽了伊斯坦堡及以奇石著名的卡帕多奇亞（Cappadocia）。

Kaman認為兩個地方都各有特色，伊斯坦堡適合喜歡觀光的朋友，當地有不少清真寺及教堂，每間都有獨特建築色彩及歷史背景，當中以藍色清真寺及聖蘇菲亞教堂最為出名。

江嘉敏（左）與劉穎鏇拍劇結緣。	天空掛滿不同顏色的旗幟，充滿異國風情。	兩人一嘗土耳其浴，但嫌未夠喉！

專人侍候脫毛浸浴

來到土耳其，兩人都有一嘗土耳其浴，Kaman自爆之前對此有不少謬誤：「我之前上網睇，見到沖土耳其浴嘅地方係用白雪雪嘅雲石，我以為啲雲石係涼浸浸好舒服，點知入到去有啲似香港焗桑拿咁，好熱、好焗，我起初唔係好慣，入面一個窗都冇，個天花板只得一個好細嘅窿，基於拍攝所以我哋着泳衣，但正式係唔着衫畀一個唔着衫嘅姨姨去服侍你，由頭洗到落尾，仲會幫你清理埋全身毛髮。」她揚言將來有機會也想來個正式土耳其浴呢！

在酒店天台欣賞日出之餘，更可以看熱氣球升空，夠晒寫意。	放大圖片	正所謂入鄉隨俗，江嘉敏換上民族服裝到清真寺參拜。

伊斯坦堡太重口味

而自認貪吃及貪玩的Kaman就更鍾情卡帕多奇亞，她解釋：「卡帕多奇亞嘅食物口味比較啱香港人，相反伊斯坦堡嘅嘢食就比較重口味，會用好多調味料，無論甜、酸、苦、辣嘅味道都係超級。當地好多人唔食豬，只食雞、牛、羊，如果接受到羊嘅羶味會鍾意食，但日日咁食，我連自己隻手都散發咗啲羶味出嚟。而且卡帕多奇亞仲可以玩越野車同坐熱氣球添！」

劉穎鏇（左）與江嘉敏寓工作於娛樂，狂擦美食。

江嘉敏指伊斯坦堡多名勝古蹟，啱晒鍾意影相的旅客。

洞穴酒店睇熱氣球

除了食物外，Kaman還很喜歡卡帕多奇亞的洞穴酒店，酒店由岩洞改建而成，裏面採用天然日光，只有小量燈源，氣氛很好：「每間房都係一個洞穴，有啲房間好大可以媲美總統套房，而且酒店老闆好好人，每日都會煮早餐畀我哋食，又會介紹我哋去啲靚景點影相。」

兩人還在酒店天台欣賞日出及漫天熱氣球徐徐升空的壯觀美景：「我哋凌晨就起身等日出，每朝清晨都會有好多遊客坐熱氣球，見到成個天都係彩色繽紛嘅熱氣球，真係好靚又浪漫。」

叔叔埋身狂派飛吻

講到最難忘，Kaman坦言土耳其人的熱情令她留下深刻印象：「記得有次我哋要搭船由舊區去新區，等上船時個碼頭好逼，多人到要心口貼背脊咁行，當地人好熱情，男人見到女仔會不停咁單眼同飛吻，因為我好細粒，所以Tiffany就保護住我，Tiffany話見到我身邊嘅土耳其人不停向我單眼，同埋想行埋我身邊認識我，之後上到船，我見有好多土耳其叔叔不停向Tiffany單眼，我哋都笑佢有艷福，因為Tiffany好有禮貌，人哋向佢飛吻同單眼，佢會好有禮貌咁點頭回應，你畀反應人哋，人哋可能會有進一步行動，我就好驚，一見到佢哋咁，就即時閃走。」