孖住出埠讚細心 麥美恩加許文軒分

藝人麥美恩昨日到屯門出席旅遊慈善拍賣活動，大讚現場拍賣的旅遊套票超值，自己亦頓時心動，喜歡四出旅遊的她笑說：「依家公司製作好認真，好多時都出埠拍攝，嚟緊我又去馬來西亞喇！不過我好想衝出亞洲，例如去非洲睇動物大遷徙。」談到早前與緋聞男友許文軒齊齊出埠拍新節目，她說：「都係去廣州一帶咋！拍粵語典故節目。（一齊出Trip後有冇對佢加分？）佢又真係幾細心，肯幫我拎嘢，落樓買支水佢都肯陪我，唔係個個男仔都做到，咁我不嬲都冇話過佢差。（佢話要跟你學嘢，想入屋多啲！）講到我老晒，但我明佢意思，每個娛樂新聞主播出嚟都好多擔憂，驚自己做得唔好，我成日都叫佢放啲。（以後有咩都預埋佢？）梗係！當年喺娛樂新聞台佢都幫咗我好多！」