日本23歲女星與父兄共浴 星媽陳琪斥匪夷所思

在日本單車比賽頻道組成三人女團Speaches的23歲成員北見直美，早前於日本TBS電視台播出、由男星中居正廣主持的綜藝節目中，驚爆現時仍跟爸爸以及三個哥哥一起入浴，為證絕非「吹水」，她竟讓節目製作單位直擊共浴實況。

邊沖邊談心 網民勸停止

節目中，北見直美與26歲哥哥一起擠在細小的浴缸中，邊沖涼邊談戀愛經外，又一起用手機看影片。哥哥完事後便輪到父親加入，兩父女並沒有因玉帛相見而有絲毫尷尬，反而閒話家常。她表示朋友當初知道共浴一事後，紛紛對她投以異樣目光，令她曾有感：「我這樣很怪嗎？」又解釋一家六口為節省用水及時間，自小已有共浴習慣，直言零拍拖經驗的她亦非常喜歡沖涼時能與家人傾心事：「雖然只有半小時，卻是一天中最享受的時光。」儘管已是成年人但仍維持這習慣。節目的現場嘉賓看畢均大感驚訝，並引起大批網民熱議，指完全無法接受成年後還與家人共浴，勸告她要立刻停止。

北見直美與哥哥邊共浴邊談戀愛經。	哥哥沖完就到爸爸，父女玉帛相見。	北見直美大方在父兄面前赤裸裸，絲毫沒有尷尬。

當地網民鬧爆，本地一班星級父母亦不能接受！育有兩女一子的藝人陳琪直斥有人博出位：「簡直係匪夷所思！我覺得嗰位女星譁眾取寵，想做一啲好出位嘅嘢，我真係接受唔到！我個大女依家9歲，就算6、7歲時已經好避忌唔會一齊沖涼，老公（藝人胡諾言）幫手沖得最多係細仔，囡囡就較少，始終男女有別。就算囡囡去廁所，都絕對唔會叫佢跟爸爸去男廁。」

陳琪坦言不會讓女兒跟老公入男廁。	林盛斌拒幫女兒沖涼，以示尊重。	黎耀祥

林盛斌「禁浴」教自我保護

至於育有三女一子的「多仔公」林盛斌，長女現已10歲，幼子亦1歲半，他坦言向來奉行「禁浴」：「從來冇試過同三個女一齊沖，就算幫佢哋沖都冇！因為我同太太都話佢哋知，身體有重要部位，需要自己好好保護，唔可以隨便畀異性睇到，所以我哋冇父女沖涼嘅習慣。如果個仔大個啲，我同佢一齊游水、換衫、沖涼就冇問題，因為大家係男人。」

有三個寶貝仔的女星羅霖同樣指不能接受：「3、4歲都可以，增進吓親子關係，但逐漸大個懂得兩性唔同時就要分開。」身為廿四孝父親的男星黎耀祥，寶貝仔黎正橋已21歲，對父女共浴認為是文化不同：「我諗中國人比較保守，日本文化都有男女一齊浸溫泉，呢啲係日積月累嘅文化，如果習以為常就唔會覺得係啲咩！我個仔到十幾歲唔會同我哋沖涼，只係幾歲時一齊沖。」