樂壇新血涂毓麟有後台壯Sing勢

涂毓麟（Oscar）、陳凱詠（Jace）、「搖滾力爆發樂隊」ONE PROMISE及「新生代節奏系樂團」Dusty Bottle，各自攜新歌兼MV現身電台進行頭炮宣傳。見Jace雙眼微紅，問是否出道前一晚緊張到睡不着？她笑住否認，但坦言真的感緊張，並指首支派台情歌《想突然》是自己的創作：「冇諗過公司會揀呢首歌，《想》本身係Demo嚟，最開心係造呢首歌嘅自由度好大，自己搵埋Rapper。新歌係講一個少女等待嘅心情，但其實我私下係男仔頭啲，冇咁少女，所以錄歌嘅時候都畀監製係咁叫我少女啲。（你都等待緊？）不嬲都冇諗，依家專注做嘢先。」

ONE PROMISE追夢唔易

至於Oscar的出道歌《二人一世界》則榮幸獲師兄郭偉亮親自操刀作曲，出身於ViuTV節目《全民造星》的他，大爆《全》導師之一的劉美君親臨錄音室畀意見。提到鋼琴、小提琴、中提琴、管風琴樣樣皆精，他笑稱之後或會嘗試參與創作部分，現時仍學習當中。問到一同出道難免會視對方為競爭對手？他們大笑指不會，一來冇得比較、二來範圍不同。

前身為Empty的樂隊ONE PROMISE首支派台歌《壹步》，印證四子十年間奮力追夢的過程，主音文迪感慨說：「由獨立單位行到簽唱片公司呢一步，成為職業性質，覺得如果用『一』呢個寫法好似好簡單，我哋行到呢步真係唔易，中間堅持唔到會好易放棄。」問可有想過放棄？結他手天衡稱從沒這想法，大家一直期待伯樂出現，更預告會陸續推出新歌。講到是次新人企劃有另一支樂隊Dusty Bottle登場，加了女主音Kerryta，他們表示愈多音樂愈精彩：「香港係一個好細嘅地方，能做到百花齊放係好事，全世界都有好多渠道發表音樂。」

Dusty Bottle玩轉廣東歌

至於Dusty Bottle出道作是富有80、90年代Disco味道的《You Don't Know Me》，他們透露與監製舒文合作加入不同新元素，獲益良多：「我哋第一年玩廣東歌，希望可以帶畀聽眾唔同嘅音樂風格。」女主音Kerryta則指見到新歌於各大平台上架，心情好興奮。