一個乞嚏，可大可小！星級父母為對抗流感，各師各法，以策安全！
諸葛紫岐：囝囝幼稚園冇停課，佢戴咗口罩兩個月，返學或去室內多人地方都會戴，佢每日飲好多水，話要沖走細菌。屋企門口、車都擺定消毒液，如果囝囝狀態麻麻都未必畀佢返學。
楊千嬅：讀小一嘅囝囝上星期有少少咳，都有請病假同佢去睇醫生，佢都正常返學，但我會觀察住佢身體狀況，平時都有教佢要戴口罩，經常洗手。
林盛斌：四個仔女得三女學校停課，其實佢哋唔去人多嘅地方，唔係好擔心，帶佢哋去街都會注意，不過細細佬呢幾日有流鼻水同咳，唔係好嚴重，我會睇定啲，再唔得就去睇醫生。
胡諾言：全家喺幾星期前已打定流感針，不過老婆（陳琪）之前中流感要食特敏福，上星期細仔發燒、咳同流鼻水，好在唔係流感，但都有傳染畀大家姐，二女幾日前都病埋，現時胡家三寶都冇事，會叫佢哋戴口罩，細佬返Playgroup未有停課。
葉翠翠：我出街盡可能戴口罩，人多都唔會帶小朋友去，如果搭(車立)多人我哋都唔會入住，依家兩個仔未讀幼稚園，但返緊Playgroup，不過我都同佢哋請咗假，擔心會傳染到。
趙頌茹：細女去年讀K3中過流感，嗰陣佢有食特敏福，之後學校停課。依家小學學校冇通告話有大型流感，如常返學，去年底政府有派醫生到學校同學生打流感針，兩個女都有打。