Kay唔搵老公過檔費事辦公室戀情！
最近有傳謝安琪見老公張繼聰快將完約，主動向老闆麥浚龍探口風，密謀拉老公過檔，前晚她現身頒獎禮時澄清︰「冇做過呢件事，消息唔知邊度傳出。」更笑言希望兩夫妻工作獨立，不想談辦公室戀愛！
謝安琪（Kay）前晚在《新城勁爆頒獎禮2018》奪兩個半獎成女歌手大贏家，講到古天樂未能現身一同攞合唱歌獎，她即認錯：「係我唔啱，因為我有感冒，累到佢冇得唱，攞咗個獎有即刻影相畀佢睇，佢都係第一次攞合唱獎。（佢諗住點找數？）佢一直都冇話唱，做咩屈佢？嚟緊頒獎禮佢都盡力度緊，佢都好想親身多謝大家同支持樂壇。」
講到有傳拉攏老公張繼聰一同簽約麥浚龍旗下，Kay以肯定語氣指沒有做過「手腳」，亦冇聽過相關傳聞︰「佢同蕭定一合作好愉快、好穩健，仲會持續一段時間添，應該未完約。同埋佢公司嘅變動對佢冇任何改變同影響，工作都係依舊，收入都冇問題，消息唔知邊度傳出。」可有想過在同一間公司合作？她幽默說︰「費事搞咁多辦公室戀情啦！咁大年紀唔好嘅，我哋各自獨立做嘢，感覺幾好。」
軒仔感到後浪追趕
至於成績暫時領先的張敬軒希望做得更好，不想失禮前輩︰「似畀後面啲天才追趕我哋，以往前輩打咗好好嘅基礎，今年有種接棒嘅感覺。」講到有傳勢奪叱咤男歌手金獎，他認為個人獎變數較大，不想抱太大期望，但有信心攞歌曲獎或大碟獎。
泳兒2019隨時嫁
而憑唯一一首派台歌《騎膊馬》奪歌曲獎的泳兒，透露有兩首歌快將派台，記者笑指她2019年就有第一單「喜事」，她愕然地「吓」一聲，然後笑說：「係呀，出歌係喜事，2019年第一個BB就係我嘅歌。」問到何時與髮型師男友拉埋天窗？她大笑說：「隨時嫁得(口架)！有冇人要之嘛！唔知幾時（結婚），可能好快，或者一排。」而同樣奪歌曲獎的菊梓喬，開心得提起裙襬轉來轉去。