曾力追「木姑娘」「青蛙王子」爆紅扮唔識

「木姑娘」近年參演多部劇集而為人熟悉，現時單身嘅佢，將全副心機放喺演藝事業。自從上年佢同舊愛分手後，唔知係咪對男士冇乜信心，一直唔敢輕易拍拖，加上向來係「外貌協會會長」嘅佢，淨係睇得上靚仔，又要靚仔又要有才華，除咗藝人之外，出面真係好難搵！

佢前排出席活動時，撞番一位多年前曾經追過佢嘅內地藝人「青蛙王子」，依家男方紅遍中港台，吸金力極高，佢梗係揼心，慨嘆多年前冇接受對方追求。咁點解當年唔受溝？皆因佢感覺「青蛙王子」似Playboy，識咗一日就力追，似乎唔多認真，加上「木姑娘」當時冇戀愛經驗，所以就請對方食檸檬。正所謂「人要面，樹要皮」，「青蛙王子」今次見番「木姑娘」連招呼都冇打，呢舊檸檬真係酸到極！