周奕瑋拖着企鵝遊九州
無綫藝人周奕瑋（Jarvis）主持旅遊節目《周遊東京》，平、靚、正的旅遊體驗深受觀眾喜歡。被大眾視為「日本通」的他，雖然曾在東京讀書，然而他最愛的卻不是這個繁華大都市，反而是樸實悠閒的九州，更在這裏經歷過不少的「第一次」，包括吃雞肉刺身、參加螢火蟲祭、乘搭特色列車之旅，在長崎拍攝節目參觀當地的水族館時，更有機會拖着企鵝行。種種回憶，都給他擁有迷戀九州的充分理由。
穿越宮崎童話境地
九州沒有過度的都市化，仍保留着很多自然風光，地靈人傑，還誕生了一位著名的動畫家－－宮崎駿。Jarvis曾乘搭特色列車，感覺猶如穿越宮崎駿的世界，就算不是龍貓火車，一樣令你樂而忘返：「呢個火車之旅係會經過唔同站，每個站大約停幾分鐘，而且有唔同嘅主題，包括關於愛情和事業等，好似玩check point，去嘅地方又會郊外啲，係平時你唔會去嘅地方，令自己成個心情都好放鬆。」
雞肉刺身你敢唔敢？
熱愛日本的Jarvis，最高峰一年可以飛往日本十多次，加上曾留學東京，對當地有深厚的情意結。Jarvis最愛九州，大力推薦在宮崎的雞肉刺身：「除咗有生嘅雞肉，仲有內臟刺身添，包括雞心、雞胃、雞膶等，雖然初頭都有啲驚，不過最後都有試，個感覺非常特別，絕對值得大家一試。」
螢火蟲祭音量要細
日本的祭典五花八門，各具特色，尤其在九州就特別多。當中最令Jarvis深刻是首次參加了當地的螢火蟲祭典：「基本上係冇咩遊客會去，我記得喺一個荒廢嘅小學操場上有唔同攤檔賣小食，之後大家就會行去對面溪澗睇螢火蟲，畫面相當靚，係好難得嘅體驗。」日本人彷彿不想驚擾螢火蟲，只是默默地欣賞螢光在黑夜閃亮，聽到的就只有潺潺水聲，感覺很特別。
鰻千寵愛可一可再
要吃鰻魚飯不難，可是九州的鰻魚飯卻與別不同，讓Jarvis一吃難忘：「其實我一直都唔鍾意食鰻魚，但喺福岡柳川嘅鰻魚飯係同其他日本地方整法唔同，個精華係喺個飯同埋佢哋秘製嘅醬汁，好味到爆，我未試過可以成碗食晒，令我非常驚喜。」
