田蕊妮蘭桂坊飲醉花容盡毀

田蕊妮坦言壓力爆燈，曾想罷拍節目。

現年41歲的田蕊妮，昨日於觀塘出席其主持的無綫真人騷節目《女人四十》記者會，任嘉賓的蔣怡、車婉婉及谷祖琳（小谷）亦有到場支持。節目中，阿田為到台灣搜尋雪卵個案而做檢查，直言：「估唔到拍呢個節目，連子宮都要出埋鏡！」她又大爆去蘭桂坊拍攝時飲醉酒，全身發紅：「佢哋問我點解面上有一點點白色，我話啲遮瑕膏冇跟住我變紅！」而小谷更醉到幾日後才發現遺失手袋，四出問朋友，最後發現手袋其實在家中，被阿田取笑：「好彩佢冇整唔見個女！不過佢好有義氣，本來喺醫院吊緊鹽水都拔咗幫我拍。」

冇奶水拒湊蔣怡B

而婉婉就將兒子BBQ交託阿田拍攝，她坦言本來不放心，又怕老公不喜歡太過高調，幸好最後順利獻出BBQ的第一次。阿田坦言曾擔心BBQ失控：「原來佢好好湊！仲伏喺我心口好冧。」問為何不選擇蔣怡或小谷的小孩？阿田笑指小谷女兒已長大，沒甚挑戰性，而蔣怡的BB仍要飲人奶，她說：「我又冇奶水。」

女人40欣賞自己

阿田受訪時坦言很緊張：「壓力好大、好辛苦，差啲唔想拍。」問有否詢問老公杜汶澤意見，她說：「有時做到好大壓力，好攰，老公見我好似攤屍咁！」她又指很多人覺得女人到了四十歲是一個結局，但她覺得四十歲依然可以好靚，要學懂欣賞自己。

大會特別送上Bra形蛋糕，慶祝節目即將首播。	田蕊妮為拍雪卵題材做檢查，連子宮都出埋鏡。	蔣怡性感上陣晒線。