古天樂頸椎移位美國開刀
型男古天樂（古仔）與鄭嘉穎昨日結伴出席活動，現場驚見古仔頸部有塊細長膠布，他才自爆因頸椎骨移位，剛到美國進行完大手術，是人生的「第一刀」：「生日完兩日後發現頸椎骨移位1cm，壓住神經線，兩日內就決定去美國做，喺條頸入面鑲入鈦金屬，已經做咗一個禮拜，經理人陪我去。」坦言自己與家人都好擔心，但不想再忍受十指麻痹及頸部10級痛楚，才下定決心接受手術，休養兩星期推掉不少宣傳工作。
擔心影響聲帶
古仔即場郁動頸部展示康復進度，指之後可以再拍戲：「醫生話6至8個禮拜會好，半年就完全好番，做完就一勞永逸！事前有擔心影響聲帶，因為做嗰陣要撥開食道，但醫生話冇咩影響，只係做完嗰日有啲音發唔到。」嘉穎問他若搭飛機過關時，可會因偵測到有金屬而被「嘟」？古仔笑言過關時一照便知道做過手術。
至於嘉穎被問到太太前晚見完「萬人迷」碧咸，依然讚他是心目中最靚仔，先冧笑話多謝，再抵死笑說：「佢同碧咸出Event都唔係咁巴閉啫！我夠同古天樂出Event！」