陳凱琳情人眼裏嘉穎型過碧咸！
鄭嘉穎型過碧咸？前港姐冠軍陳凱琳前晚首次跟「萬人迷」碧咸見面時讚不絕口，連對方的紋身也一樣畀Like！讚還讚，她不忘向老公鄭嘉穎大笠高帽，指兩人比較還是老公最好，識做呀！
前晚「萬人迷」碧咸（David Beckham）現身香港出席腕錶品牌帝舵表的活動，以西裝上陣的他舉手投足盡顯型格，甫出場即大顯親民，主動跟來賓及傳媒微笑揮手打招呼。未有受訪的他僅現身短短五分鐘，已令現場群情洶湧，尤其有求必應、答允玩自拍合照時，不少來賓即上前喪影！
叫老公跟風紋身
同場藝人陳凱琳、袁澧林與余德丞，獲安排跟碧咸交談及合照。首次見萬人迷的陳凱琳勁興奮兼讚不停：「佢真係好有型！佢頸嘅紋身好Man，今日又着埋西裝，斯文得嚟又有型。合照時，佢自我介紹後仲讚我今日着得好靚！」當問到與老公鄭嘉穎比較誰更有型？她說：「一定係老公！因為喺我心目中梗係自己嗰個最好啦！不過碧咸真係好有自己風格。」問到會否叫老公紋身，她表示不能強迫：「紋身對佢哋個人嚟講係一啲重要嘅事，作為一個紀念。（試吓整個愛的紋身？）如果係好似結婚日子、小朋友嘅名都可以考慮。」
余德丞未踢得波
身為球迷的余德丞指碧咸是其偶像之一，細細個已經睇對方踢波：「我有佢嘅波衫，記得佢有次半場笠射，真係好經典！最搞笑係我媽咪成日同我講，人哋着件白色底衫都型過你着成套西裝。」又指以現時狀態仍未可以踢波，不時「腳痕」：「我有去番出事嘅球場，只喺場邊搓咗10分鐘波已好足夠，連足球鞋都冇帶，令自己一定唔會踢。」
