「愛．回家Terry」李偉健愛妻宣言有10蚊畀9蚊你
以「愛．回家Terry」一角為人熟悉的李偉健昨日與圈外女友結婚，新娘表現害羞，在記者要求下，換上婚紗後才與老公甜蜜咀嘴。他更即場發表愛的宣言，搞喊老婆！
於無綫處境劇《愛．回家之開心速遞》中飾演Terry的藝人李偉健，昨日與拍拖15年的圈外女友阿寶拉埋天窗，並於銅鑼灣一間酒店筵開22席，兄弟團由同劇的李霖恩、周嘉洛、阮政峰及圈外好友組成，而「大小姐」林淑敏、「送水輝」許家傑及阮政峰擔任司儀，胡渭康與鄭世豪則任表演嘉賓，好拍檔「KC」歐瑞偉與劉丹、呂慧儀、滕麗名、姚瑩瑩、謝芷倫等到賀。
李偉健透露因遲交證件，昨日趕不及註冊，要待11、12月才能正式辦理註冊結婚手續。問到求婚經過？他表示將兩人旅行時拍攝的短片，加入花及戒指的卡通特效，令阿寶猜到他有意求婚，最後成功結束愛情長跑，他不諱言現時既開心又疲累。婚宴以日式風格布置，因他喜歡日本神社及漫畫，更會到當地度蜜月。講到接新娘，他笑言冇難度：「普通遊戲。（開門利是？）我收入微薄，班姊妹收貨已經好好。（計劃生小朋友？）過一、兩年先諗。（會唔會乘機為兄弟牽紅線？）由佢哋自由發展。」他於晚宴上又向老婆發表愛的宣言：「我愛你！有10蚊畀9蚊你，要你幸福快樂。」令新娘子感動到喊。
兄弟團成員阮政峰搞笑抱怨接新娘時被玩殘：「佢哋都冇顧我感受，我幾乎腎病，因為啲飲品係甜酸苦辣，本身我好驚鹹嘅飲品，但最後成杯飲晒，到依家仲痛緊。」
胡渭康踩場自爆HeHe情
胡渭康則突然重提曾與李偉健傳緋聞，如今對方結婚，儼如親手送緋聞男友「出嫁」。至於許家傑透露與新郎同是2009年參選香港先生，出埠經常被安排同房，玉帛相見：「李偉健係健身教練，身形好弗，我唔夠佢嚟，後來入行後大家各有各忙，直至呢套劇先撞番。」林淑敏則表示見證「細佬」成家立室很高興，對於許家傑日前食物中毒入院，她有點勞氣指「元兇」是糯米雞。