Twins巡唱24場埋單袋千萬
組合Twins前晚在澳門舉行巡唱終站，結束24場巡唱，估計為兩人帶來逾千萬收入！兩人的另一半當晚都有到場支持，鍾欣潼的老爺奶奶亦有來支持新抱！
2015年底在紅館展開巡唱的Twins，歷經接近三年到世界各地開騷，鍾欣潼（阿嬌）及蔡卓妍（阿Sa）前晚返回澳門威尼斯人舉行《#TWINS#LOL#世界巡迴演唱會#澳門#終點站》，正式宣布圓滿結束！經歷了24場演唱會，估計為兩人帶來逾八位數字的收入，認真厲害！
阿Sa聲帶有事
前晚演唱會上，兩人的另一半都有捧場，其中阿嬌老公賴弘國及其老爺、奶奶坐正第一行捧場。她們身穿短打露腿又跳又唱《着睡衣跳舞》掀序幕。唱完一輪慢歌後，兩人表示眨下眼已出道18年，亦指今年因拍戲而少時間見面，阿Sa說：「上星期阿嬌無啦啦Send Message畀我話好掛住我，我當堂打個突！」其後，兩人與觀眾握手，期間阿Sa慘叫畀人抓到成塊皮甩出來：「你哋係咪淨係鍾意阿嬌，唔鍾意阿Sa。」最後以《戀愛大過天》作結束。
騷後受訪時講到終於完成，阿Sa透露其實聲帶有事：「真係要好好養聲先，唱歌要停一停，拍戲先！原先仲話諗住開多幾場。」她又表示門票開賣首日便售罄，亦聽聞有人睇了半場後把票尾賣掉，坦言真的很難控制：「場地可以坐一萬人，如果每個人都咁做，咪即係有三萬人入咗場？」
阿嬌兩年後生B
講到與老公拍內地真人騷《爸媽學前班》，阿嬌說：「真係學到嘢！做爹哋媽咪真係唔容易，但起碼知道我老公會係一個好爹哋，但暫時冇諗住生BB，可能兩年後。」講到有指將於12月在香港擺酒，她承認此事：「不過未定晒啲嘢，因為仲未申請排期簽字。」
特派記者林惠珊澳門報道