杜德偉年年一両金千嬅送保險
天后楊千嬅與杜德偉（Alex）首次合作開騷，前晚在亞洲國際博覽館舉行《AIA主辦楊千嬅杜德偉音樂會》，歌手蘇永康、方力申等撐場，有觀眾站着起舞，Alex笑言可考慮將來做巡迴騷。
育有兩歲囝囝的Alex就分享每年送一両金給兒子做生日禮物，到囝囝18歲便有18両金，千嬅聞言即大讚：「好Sweet呀！小朋友生日禮物唔可以漏，漏咗會追番你。我個仔細個都收過老人家送金，我幫佢買咗十份八份保險，同儲金都差唔多。」Alex指兒子前晚沒有到場，但已率先看過總綵排：「總綵排嗰日係佢兩歲生日，媽咪帶佢嚟後台切蛋糕，我喺台上面唱happy birthday to you畀佢聽，佢係第一次見到Daddy喺台上面唱歌。」並拍下影片，待兒子長大，可以重溫父母對他的愛。
畀囝囝自己解決問題
說到唱歌，Alex絕對是師兄，但講到湊仔，千嬅自認是師姐，她說：「我湊多佢幾年，經驗多啲，所以我哋約食飯都係傾湊仔經，我個人就覺得湊仔同女真係方法唔同，仔真係唔使好保護，反而要畀多啲自由空間佢去發揮，有問題等佢去承擔去解決，咁先至令佢哋成長。依家老師會同我講學校發生咩事，但係我唔會過問，由得個仔Torres自己去面對囉！」
