區瑞強一「陌」相承與定欣擦火花
資深歌手區瑞強（Albert）將率領一眾靚聲歌手開騷，鮮有籌備群星騷的他，期待跟視后胡定欣於台上一展唱功，更透露屆時會大唱經典金曲《陌上歸人》讓Fans大飽耳福！
《經典金曲50年靚歌靚聲靚唱會》將於10月26至27日在伊利沙伯體育館舉行，Albert指今次有別於每年的「例行」個唱，將找來唱家班演出︰「5個女仔湯寶如、羅敏莊、詠詩、林志美同拉姆就係主角，其他就係互相交替。」講到近年先後參與舞台劇、踏足紅館任嘉賓的胡定欣，今次亦榜上有名，並主要跟Albert對唱。談起定欣，Albert指二人早年於一個晚宴結識，得悉她非常鍾意唱歌，便曾多次邀請合作，直到今次才能成事：「首次合作就好有火花，始終唱歌同做戲係兩回事，相信好多人都想一睹佢唱歌風采，係一個吸引點。」
羅敏莊聲色藝全
Albert再點名大讚羅敏莊是一位聲色藝俱全的藝人︰「一早已經知道佢唱歌叻，好欣賞佢，當時知佢邊做DJ邊學唱歌，經過一條路再做番歌手，好難得。淨係講唱歌佢都好多元化，好少有後生女有呢種Talent，仲要再遺傳咗畀佢個女。」
問到每次開騷必唱哪首金曲？Albert秒答名曲《陌上歸人》，更指如果不唱的話會對不起歌迷，今次演唱會也不例外，他說：「每位歌手都會有首代表作，係歌迷永遠都要求唱，不過大部分歌手反應都會話唱到好厭、好悶，我就會安慰佢哋，『你可能唱過一千次，但佢只係聽到一次，能夠有首代表作係唔易』，對我嚟講同一首歌喺唔同地方、環境、心情唱都會有唔同感覺。」
靚歌三「重」推廣
身為靚歌保育「策劃人」，他於二十多年來致力推薦經典好歌，作三「重」推廣：重錄、重唱、重介紹，更藉機會提攜後輩，不時邀請上演唱會、電台自家主持節目獻聲，將其「生命」延續下去：「有啲歌佢哋未必聽過，就當新歌聽，依家再做一隻呢啲歌仲難做過新歌！」