傅珮嘉換個身份再上絕路
歌手傅珮嘉（Maggie）闊別香港樂壇多年，最近推出廣東歌《絕望元年》，歌路繼續慘絕人寰，只是她已不是當日的悲觀少女。成為人妻及人母的她大爆老公初時並不知其歌手身份，卻在不知不覺中改變了她：「佢令我明白自己浪費咗好多時間喺無謂堅持上面。」
Maggie以藝名高雪嵐出道，把《絕》唱成大熱歌曲，獲當時老闆力捧之際卻突然陷入樽頸位：「我冇辦法寫出一份滿意嘅作品，創作人冇靈感就死o架啦，乾塘！唔知繼續行落去係點，好迷惘，好灰心。」她形容唱歌是自己的全部，遇上低潮期惟有出走台灣作沉澱之旅，誤打誤撞竟在古董店做學徒：「賣古董唔係淨係介紹幾錢，仲要學習佢嘅歷史同點樣打理，我用咗差唔多一年時間去做。原來唔一定要做歌手，我可以好貼地咁每日返工8個鐘。」
老公不知身份
身為唱作歌手，Maggie曾認為性格十分重要：「以前我唔會成日嘻嘻哈哈，覺得唔需要喺人哋面前表露心情，要做番自己，但公眾人物隨時隨地都要準備好面對鏡頭。」直至在朋友介紹下認識到台灣老公周思甫，她才逐漸放下心中執念，想不到拍拖頭半年對方完全不知道她是歌手：「佢一直喺加拿大生活，20幾歲先返台灣。有朋友問佢我係咪唱《絕》嗰個高雪嵐，佢聽過首歌，但唔知高雪嵐即係傅珮嘉！」
10年兒子出生後，新手媽媽Maggie邊做邊學：「父母喺美國，冇人幫我手。我成日都好忟、好冇耐性，老公話BB都有壓力，但佢唔識表達，我係點樣就會投射落小朋友度，我必須改變脾氣，佢先會成長得開心。」
因兒子變豁達
她坦言老公及兒子令她變得豁達和學懂處理情緒，老公更支持她重回樂壇：「魏如萱開騷，我去撐場，老公第一次感受到我喺台上唱歌係幾開心。唔知依家市場鍾意咩，亦唔知歌迷仲係咪接受我，但我覺得只要相信首歌好聽就要去做，萬一真係唔好咪返去湊仔囉！」
髮型：Ason Wong@HAIR（Festival Walk）
服裝：tout à coup