大宇遇大雨上香即停！
鄭少秋、陶大宇和游學修等主演的ViuTV劇《詭探前傳》，前晚在盂蘭勝會的神功戲棚取景，由於滂沱大雨未停過，阻礙了拍攝進度，大宇呆等多時之下，忽然跑去上香求停雨，「大宇求停雨」最後亦靈驗！
演驅鬼大師的秋官和演黑幫大佬的大宇，前晚在神功戲棚演出一場「大鬥法」的重頭戲。由於《詭》劇以鬼神為題材，加上正值盂蘭節，故特別借用油塘區神功戲棚的真實場景拍攝。劇情交代鬼上身的游學修，耍纓槍擊退多名正追殺大宇的殺手，大宇因而想收阿修為手下，但遭師傅秋官阻止，秋官希望阿修行正途，又想收歸門下，因而發生正邪兩大人物爭o靚大鬥法！
秋官唔敢開玩笑
不過，深夜時分一度黃雨又打雷，惡劣天氣阻礙了拍攝進度，大宇呆等多時，忽然跑去上香求停雨：「原本唔太信邪，點知上完香，真係5至10分鐘內停雨，都覺得好神奇！」問到鬼節當前，可曾遇過怪事？他說：「當年喺電視城拍劇時因為太攰，喺休息室瞓覺，試過畀鬼責！」
秋官則表示有傳盂蘭勝會的神功戲棚所演的大戲是畀鬼睇：「所以我哋喺呢度唔好亂咁開玩笑！」游學修則稱所演的角色經常頭痛，又要鬼上身，很花力氣，不過他就百無禁忌。
