高海寧「Hurt」爆呻冇得升呢
高海寧前晚出席煞科宴指拍劇時撞傷後腦至今視覺還有重影，要半年後才康復。經常論盡受傷希望洗脫「豆腐Ling」之名的她，卻在煞科前再「掛彩」，保持容易受傷的本色。
無綫藝員高海寧與馬國明等前晚夾錢請劇集《C9特工》台前幕後工作人員吃煞科宴，高海寧說：「呢套劇都拍得有啲辛苦，因為外景好多打戲、爆炸、樹林、飛車戲。」拍攝時撞傷後腦及盆骨，現時視覺還有重影的她，透露醫生指還有半年時間才能完全康復。
繼續做「豆腐Ling」
拍攝時經常論盡弄傷自己的她笑說：「瘀傷好得七七八八，本來以為可以升呢做『油豆腐Ling』，但啱啱拍咗場動作戲，自己又飛咗出軟墊，搞到又多咗啲傷痕，所以繼續都係『豆腐Ling』。」她慶幸稍後才為另一新劇《殺手》開工：「《殺手》咁啱喺七月十四拍棺材舖廠景，嗰日講開啲燈都突然閃閃吓，哈哈！」
賺外快買磚頭
馬國明指完成劇集後可努力賺外快，坦言之前忙於拍劇推了不少活動。問到是否儲老婆本？他笑說：「唔係，阿媽大使咗，話唔夠錢使喎！」又指老婆本會自己儲，不用勞煩阿媽，他自嘲比較蠢，不會投資，可能會趁樓價下跌，與家姐一齊買樓收租當儲錢，直言買「磚頭」始終最穩陣。
講到早前出席鄭嘉穎婚禮可有被感染想結婚？他說：「冇，唔關事嘅。我冇嘉穎大哥咁有錢，要儲吓先！」又笑言峇里之行與林子善同房，令他完全提不起勁游水：「我唔慣同男人游水，我都有坐喺櫈度睇佢水中撥頭髮，喺度幻想點解唔係同女仔呢？就咁度過咗兩三日。」