林師傑打回原形大開食戒
歌手林師傑早前為拍劇狂減20磅，忍口多時的他最近已打回原形，日前與女友歐陽巧瑩現身超市購物，見他如「放監」般狂掃高熱量食品，然後又去快餐店買炸薯條外賣，齊齊返歸來個「大解放」！
現年30歲的林師傑與歐陽巧瑩（Tammy）拍拖四年，表現甜蜜，不時在社交網放閃，去年底更被星夢老闆何哲圖大爆他求婚成功，於今年11月22日拉埋天窗。早前他為演好無綫劇《特技人》中身手不凡的「飛邊」一角，當時體重達180磅的他，除了一日三餐戒甜戒鹽戒澱粉質外，亦狂做運動操肌，未婚妻每天為他準備減肥餐，最終在短短28日內減了20磅，收身成功。
行街突然煙癮起
日前晚上約十時，師傑與Tammy現身坑口街頭，兩人突然煙癮起，走到旁邊各自拿着一根煙吞雲吐霧，完事後走進附近超市掃貨。步進超市，師傑即「自動波」推住購物車往雪櫃，極速掃了兩包餃子及兩大包燒賣後，再拿兩Pack合共24罐汽水，之後「兩夫妻」往揀選零食，未幾又去掃兩包蝦條、芝士波、雪芳蛋糕等煎炸及高熱量的食品，其後再去選購日常用品。
外賣薯條先夠喉
臨走前，Tammy再挑選了一些蔬果，見她拿起一盒青提子細心地揀選，之後往排隊付款，師傑做阿四負責拿着兩大袋戰利品離開。雖然兩人已掃了大堆食物，但似乎意猶未盡，再步往附近快餐店買包及炸薯條外賣，等候期間，Tammy曾挨着男友肩膊撒嬌，然後齊齊上樓開餐。
