荷里活巨星夫婦畢彼特（Brad Pitt）與安祖蓮娜祖莉（Angelina Jolie）兩年前驚爆離婚後至今仍在打官司爭奪六名子女的撫養權。有傳近日安祖蓮娜終於等到出火，提交法律文件指控畢佬自離婚後從未畀過贍養費給子女，但求「速戰速決」將子女判給她！
據知安祖蓮娜要求法官今年簽發離婚判決書，望可以回復單身，而日前她透過律師提交的法律文件中，爆出自「離婚」後畢佬從未就六個仔女畀過正式贍養費，就算雙方有非正式協議，男方都從未配合協議內容，所以希望法官將子女的撫養權判給她。不過，熟悉畢佬的知情人士指安祖蓮娜的指控可笑，並指畢佬近兩年一直有畀贍養費，更畀幾百萬美元，比起二人的協議金額還要多，又透露將有證據曝光。
除了有熟悉畢佬的人士「幫拖」之外，連近期與他和好的影星前妻珍妮花安妮絲頓（Jennifer Aniston）亦被指力撐前夫對抗安祖蓮娜。知情人士說：「珍妮花好了解畢佬，佢為對方要爭小朋友打呢場仗感到痛苦，又覺得安祖蓮娜咁唔成熟好可恥，覺得安祖蓮娜應該要以小朋友需要為先，並同畢佬協議好呢個重要決定。」
誓奪子女撫養權之外，安祖蓮娜更被傳趁在英國拍戲時聘請一支偵探團隊，全天候監視畢佬的一舉一動，來證明他是個不合格的父親！有爆料者說：「安祖蓮娜吩咐佢哋（私家偵探）集齊畢佬嘅黑材料，尤其係佢同咩女人來往，到時佢就會用呢啲資料喺離婚同撫養權官司上，佢已準備打呢場仗！」正當她以為「勝券在握」之際，有指近日忙於拍新片的畢佬已修心養性：「畢佬好努力工作，佢冇飲酒亦冇食大麻，更加冇周圍識女仔，現階段相信安祖蓮娜會『徒勞無功』！」