陳凱琳轉陣布吉行禮？
藝人鄭嘉穎、陳凱琳（Grace）將於8月12日在峇里結婚，由於近日印尼發生地震，有傳他們將改在泰國布吉行禮。昨日，Grace在instagram上載酒店泳池照，除了「打卡」自爆身在泰國布吉某酒店外，又留言：「Peaceful！」令人更加懷疑她與嘉穎是否真的改了結婚地點！該處是布吉一間五星級酒店，房間價格最少盛惠1,300港元。此外，待嫁新娘Grace近日不時上載食物照，看來相當「擦得」！
至於Grace的兩位好姊妹陳瀅與賴慰玲昨日為無綫新劇《廉政行動2019》試造型，被追問婚禮地點時，將見證好友出嫁的賴慰玲說：「佢哋未公布地點，都知道佢哋想低調進行婚禮，所以詳情都係由佢哋公布。（照原定去峇里？驚唔驚地震？）佢哋去邊度，我哋都會跟住去，送上最大嘅祝福。」陳瀅則未能出席婚禮，但會送上自行設計的首飾作賀禮。
另外，陳瀅在新劇將與陳家樂合作，問到可擔心傳緋聞？她說：「唔會，因為ICAC嘅劇冇感情線、冇咀戲，好正經。（大家都單身，有冇發展機會？）應該唔會，冇乜機會。」不過她口中說不，卻愈講愈怕醜，不停流汗！