薛凱琪對抗心魔砌低躁鬱症
與盧凱彤（Ellen）同樣患上躁鬱症的薛凱琪（Fiona）曾獲Ellen鼓勵，告訴她康復後回望這個病會覺得是份禮物，可惜Ellen最後不敵病魔煎熬離世。身為過來人的Fiona坦言雖擔心躁鬱復發，但會時刻提醒自己能夠戰勝病魔。
患躁鬱症的歌手Ellen日前在跑馬地寓所墮樓身亡，其實不少圈中人亦曾飽受情緒病煎熬，例如Fiona早年患躁鬱症，幸好後來康復。當日Fiona聽到Ellen離世消息，在社交網發文悼念，並透露Ellen曾鼓勵同病相憐的她：「我永遠記住了那番話，我的康復有許多原因，但你的每一句話對我來講都很重要，我會一路把你的鼓勵和愛帶給所有有需要的人。」可惜，Ellen竟然先行一步。
情緒大變有幻聽
已走出躁鬱症陰霾的Fiona前晚接受本報訪問，回望過去病發時，她坦言：「嗰時唔知道係一個病症，只知道自己情緒大變，有幻聽，當開始想死時先知自己有病，去睇醫生食藥，嗰時每日要食六、七粒藥，但食咗藥個人迷迷糊糊，提唔起勁做任何嘢，連睇醫生都唔想，要啲朋友逼我陪住我去睇，睇住我食藥，之後醫生證實原來我都係躁鬱症，情緒過度上落，仲成日喊。」
問到可擔心復發？Fiona坦言：「有擔心過，所有病都會翻發，好似感冒咁，我覺得係自己個心畀呢個病（躁鬱症）我，所以會提醒自己有能力康復，自己可以戰勝佢。」她亦以過來人身份跟粉絲分享：「有患抑鬱症嘅粉絲搵我，我真係有同佢哋出嚟食飯傾偈，同佢哋祈禱，我又會送十字架畀佢哋，等佢哋睇到我康復，做個榜樣畀佢哋。」
患者擅於掩飾
Fiona亦謂情緒病患者擅於掩飾自己：「抑鬱症同失戀一樣，同朋友食飯時完全冇嘢，但返到屋企就變另一個人，因為佢哋扮得好叻，所以病患者真係要話畀人知，要同人傾訴，唔好沉澱喺黑暗中。」並呼籲大家多關心身邊人，少說負面說話。