憑演出百變天后Lady GaGa名曲《Born This Way》MV而走紅、有「喪屍仔」（Zombie Boy）稱號的加拿大紋身模特兒Rick Genest，大前日被發現在加拿大蒙特利爾家中，懷疑因情緒病自殺身亡，終年32歲。
本月7日便踏入33歲的Rick，最後一次在社交網留言已是6月初，當時他答謝記者為其做了平易近人的訪問。而他死後翌日，亦有疑似助手為他在社交網貼上一張從水井底向上望的照片，並引述他寫的詩來致敬。據知Rick於15歲時曾發現罹患腦瘤，一年後戰勝病魔，並同時愛上紋身，全身布滿不同圖案，亦因臉上的骷髏頭紋身而被稱為「喪屍仔」。除拍MV外，Rick亦曾進軍影壇，拍過奇洛李維斯（Keanu Reeves）主演的《浪魂47》（47 Ronin）。
曾與他合作的GaGa於社交網留言悼念：「我朋友喪屍仔Rick 嘅自殺令人大受打擊，我哋要更努力改變文化，令精神健康更受關注，唔好再避諱唔講。如果你受緊苦，今日就打電話畀你朋友或家人。我哋一定要互相拯救。」
此外，Rick於2013年曾應歌手麥浚龍（Juno）邀請來港為其歌曲《鶴頂紅》拍攝MV，更上演大膽同志咀嘴鏡頭，這更是Juno的螢幕初吻！Juno昨得悉其死訊亦感愕然：「慶幸我哋曾經遇上，合作咗幾日，聽佢講佢嘅故事，講嘢好溫文，感覺到佢係非常渴望自由嘅人。知道佢離開呢個消息，好突然好可惜。離開咗呢個身軀，願佢到達更美麗嘅地方。」
而香港星級形象指導師郭慶彬（Ricky）多年前亦曾在時裝活動上認識他，Ricky受訪說：「我哋唔係見過好多次，但佢都認得我，因為大家個名好似，佢向朋友介紹我做『Double R』，佢好Nice，之前喺巴黎時裝周撞到佢都會打招呼，當時佢話全身有紋身已經8、9年，仲建議我唔好喺骨位置紋，會比較痛。」