梁漢文仆爆額見骨縫37針
足球發燒友梁漢文（Edmond）昨日凌晨睇世界盃睇到撼爆額頭！急送院的他傷口長達7cm，深到見骨，共縫了37針，雖受無妄之災仍搞爛Gag說：「我係中頭獎，之後就發圍！」
Edmond於凌晨三時半在社交網上載受傷入院相，更發揮其搞笑本色說：「聽朝做個大手術後會變得更靚仔！」他留言講述事發經過，表示因心血來潮趁世界盃熱，相約朋友到卡拉OK打牙骹觀賞賽事，豈料中場休息期間，有朋友想他唱《一世一次戀愛》，但因沒看到有級樓梯而不慎跌倒，頭部撞落枱角，當場流血不止，要立刻入院接受治療。年初因醉駕被判罰，如今又撼爆頭，問他可覺得黑仔？他笑說：「呢啲叫鴻運當頭呀！」
如期出發俄羅斯
中午接受手術後，Edmond拍片向大家報平安，雖然戴上口罩，但尚算精神，額頭貼上大膠布的他用手指住傷口說：「縫咗37針，長度係7cm，深度就見骨，依家要做嘅嘢做晒，等緊埋單同去食嘢，因為好肚餓，多謝大家關心！」據知醫生為他縫這麼多針，是因為縫得細密，傷口會愈合得更好。出院後他笑言「鬼打咁精神」：「繼續頂頭槌都得！我照過腦掃描乜事都冇，今個月13號我會如期出發，飛去俄羅斯睇世界盃。」