王君馨素顏怕醜搵老公擋駕
無綫花旦王君馨（Grace）與老公Daniel向來恩愛，日前拍拖現身戲院，戴帽遮素顏的她，當發現有記者，即搵老公作人肉擋箭牌，並拉低帽子掩面不欲「真面目」曝光！Daniel見到老婆的慌張反應，亦忍不住笑。
已為人妻有一年的Grace與老公Daniel婚後一直居於將軍澳，日前上午11時許，夫婦二人一身街坊裝打扮於該處的商場拍拖，醫肚後手拖手步往附近戲院，踢拖上陣的Daniel先往排隊購票，戴着白色Cap帽遮素顏的Grace則在旁等候，及後才步往老公身邊齊齊於櫃台前揀位，期間兩公婆有傾有講。
黑眼圈面色蒼白
不過，當見到記者在場時，她即躲在老公身後，又急急用手遮面，相當怕醜，皮膚蒼白兼黑眼圈盡現的她，繼而再拉低帽子避開鏡頭，反觀其夫極為大方任影唔嬲，他見老婆如此慌張，還笑到四萬咁口。其後Grace尷尬地向記者微笑打招呼，問到是否與老公拍拖睇戲？她說：「唔係呀！我陪佢嚟買飛咋，我唔睇o架，因為一陣要返工。」買完飛，兩公婆便轉身走人，她臨走前亦有揮手Say Bye！
