蔡立兒絕戀夠了新歌玩寸佢
人妻歌手蔡立兒（Cherrie）相隔廿年再推出新歌《信號》，與老公歐陽德勛為做新歌召開「家庭會議」，刻意擺脫《絕戀》的悲情女聲，決定45歲重拾快歌之路，還要唱得寸、唱得有態度。
Cherrie今年初完成音樂會，小休後便推出全新作品，唱片公司出動金像獎得獎班底陳心遙和戴偉為新歌填詞，歌曲由糖兄操刀，Cherrie表示：「廿年冇出新歌，真係想唱啲特別啲，唱慢歌定係快歌，定位都好重要，所以同老公商量，互搵資料以後開個家庭會議，估唔到最後我哋諗法相同，決定要快歌，因為廿幾年嚟都《絕戀》咗好耐，唔好再停咗喺度；另外，蔡立兒同悲傷、情感、Sad同絕戀好似成為等號，但我想話畀大家知唔係咁o架，我蔡立兒第一個階段都有唱快歌，喺流行榜仲係冠軍歌，唔好忘記咗。」
唱歌如演戲
相隔多年出新歌可有壓力？Cherrie說：「定咗歌嘅風格後，錄音嗰時係有壓力，因為想用唔同聲線去唱，今次唔係Hifi碟，可以用另一個我，喺錄音室試過用高音、中音、飆高音、低音、假聲，最後由監製決定用邊個Key。（有冇難度？）某部分佢要我唱得寸啲、要有啲態度，某啲位唱得開心之餘又要夠力量。」感覺唱歌如演戲？Cherrie笑言：「係呀，覺得係用聲音去做戲。」
唔做Hifi天后
去年她重踏樂壇推出Hifi碟翻唱別人的歌，但今年就不想當「Hifi天后」之列，Cherrie笑言：「出Hifi碟畀人覺得係靚聲，但唔係唔出Hifi碟就唔靚聲o架嘛，唱其他都可以靚聲，咁我又冇話唔再出Hifi碟，但自己想試唔同嘢，試咗Hifi碟咪試其他囉，所以先錄咗呢首《信號》。」