相隔6年！千嬅 丁子高同日同地開刀

千嬅笑指與丁子高同月同日「喺肚拎啲嘢出嚟」，認真幽默！

影星劉嘉玲、楊千嬅、陳奕迅與太太徐濠瀠及陳奐仁等，昨晚在中環出席慈善籌款晚宴，身穿黑色大露背裝的千嬅透露，老公丁子高前晚盲腸炎入院開刀，但有份搞此活動的他，仍緊張得不停處理公事。講到老公的病況，千嬅說：「傷口已經埋口，睇吓有冇血水出，如果冇咩大礙就可以出院，可能係近排抵抗力唔好，細菌入腸發炎。」

事有湊巧，千嬅笑言6年前同一日，兒子Torres於老公做手術的醫院出世！問到會否叫老公Keep住條盲腸？千嬅笑說：「唔會啦！白色，有膿o架！但真係好巧合，我同佢喺同一日子喺肚度拎咗啲嘢出嚟！」

劉嘉玲讚偉仔有運動細胞

至於身穿黑色Deep V晚裝的嘉玲，忙於綵排英皇舞台劇《奪命証人》，她表示之後會到法庭旁聽了解：「我未去過香港法庭，內地就去過，睇戲就睇過，今次係第一次。（演法庭戲有冇難度？）不停睇劇本，未背晒對白，啲對白都長，同平時唔同，壓力一定有。」談及老公梁朝偉參加香港帆船賽奪得第二名，嘉玲指對方很高興，之前也到匈牙利參賽，百多人之中排名三十幾，成績很好：「佢不嬲都鍾意海同水，平衡力好好，佢做演員耽誤咗做運動員啦！佢真係好有運動細胞，我都想學帆船，覺得好靚、好有型，但之前學滑水學咗好耐先識。」

偉仔勁到出戰國際賽，劉嘉玲亦心郁跟老公學帆船。	張王幼倫（左起）、陳奕迅與徐濠縈在慈善活動巧遇「恐龍」！	老公做手術仍心繫工作，千嬅難免心痛。