Kim飛釘攞獎爆未紅時受辱
有「時裝界奧斯卡」之稱的美國時裝設計師協會（CFDA）頒獎禮前日於紐約舉行，一眾時裝界猛人出席，其中真空飛釘上陣的美國真人騷女王Kim Kardashian勇奪「最具影響力獎」，歌手老公Kanye West推出的新碟亦同時橫掃銷量榜，兩公婆威到盡！
Kim Kardashian與兩個妹妹Kourtney及Kendall Jenner一同出席，她上台領獎時打趣地說：「我大部分時間裸露，竟然獲時裝獎真係有啲震驚！」Kim自爆七年前未紅時，曾向宣傳人員定下做時裝封面女郎的目標，但當時被對方「潑冷水」指目標永遠不會達成，成名後她將擔任封面的《Vogue》雜誌連簽名寄給對方還以顏色！
老公Kanye新碟橫掃銷量榜
雖然Kim的另一半Kanye缺席，但現場播出他與兩歲囝囝Saint預先錄影的片段，搞到Kim既驚喜又感動，並形容老公是她的最佳造型師。雖然Kim成為全晚CFDA的焦點，但擔任主持的諧星Issa Rae卻「唔生性」當眾落她面！Issa在開場白時擺Kanye上枱：「喺方便嘅時候才會係黑色，呢個笑話係我嘅選擇，就正如奴隸制。」明寸對方早前揚言「奴隸是黑人的選擇」的爭議性言論！老婆威到盡，Kanye亦不甘示弱，他的新大碟《Ye》在串流音樂平台上架幾日，累計串流量已過億，63個國家iTunes專輯榜封冠。
「黑珍珠」遭不平等對待
除了Kim之外，一眾時裝界名人紅星如名設計師Ralph Lauren、Donatella Versace及「時尚界達人」Ashley Olsen與Mary-Kate Olsen都有獎攞，其中「黑珍珠」超模娜奧美金寶（Naomi Campbell）獲頒時裝Icon獎！現年48歲的娜奧美在台上發表長達七分鐘致詞，指與Kim一樣未紅時不被看好：「因為膚色關係，我已畀人講過好多次唔可以做某啲嘢。我都係人，有時都會感到好難受！作為對自己種族驕傲嘅女性，我今日企喺度話畀大家聽，我將繼續推動呢個行業嘅多元化同平等。我哋唔肯定點解CFDA花咁長時間至正式封娜奧美為Icon，但我哋好慶幸已發生咗。」