林芊妤下月註冊攰爆唔擺酒
懷孕四個月的林芊妤宣布佗B仔，更會在下月與大隻男友Wang註冊結婚。她坦言早有打算一切從簡，但未想到因懷孕太攰，連旅行結婚都取消，留待BB百日宴再好好慶祝。
早前宣布有喜的林芊妤（Coffee）昨日到柴灣拍攝美容廣告，以入膊背心配短褲健康性感示人，更貪靚踩三吋高跟鞋拍攝。晒出纖腰的Coffee未見肚凸凸，身形依然弗爆，但她大呻：「肥咗呀！由47kg到51.5kg，都有少少升Cup。（懷孕幾耐？）4個月左右，已確認係B仔。」
行騷着厭婚紗
問到會否休息養胎，Coffee笑言BB好腳頭，懷孕後仍接了不少工作，但之後計劃放個假，下月更會與大隻未婚夫Wang拉埋天窗：「之前有諗旅行結婚，但真係好攰，所以取消埋，會喺下個月註冊，然後同屋企人食餐飯，佢屋企人都會由澳洲過嚟，可以正式嗌老公！（影婚照？）之前喺香港影咗輯Casual嘅，以前做好多婚紗騷，依家結婚我反而唔想着，我想一切從簡，或者BB百日宴先慶祝。」
唔好睇小大肚婆
Coffee又指懷孕亦不影響瑜伽工作：「大家唔使擔心，亦唔好睇小大肚婆，其實大肚婆做到好多嘢！我見有國外媽咪仲會做倒立。（另一半擔心？）佢知我好Tough，係不到黃河心不死嘅個性，但有告誡我嘅。」
