偷食搞大個肚！Morena抗拒標籤為「壞女人」發聲
飾演超級英雄「死侍」女友的38歲女星Morena Baccarin，堪稱圈中烈女，曾以「有夫之婦」身份搭上電視劇拍檔，而且未離婚已為情夫佗B！她又覺得女人容易被針對，隨時因「做自己」而被標籤為「淫婦」！
Morena於2011年與美國導演Austin Chick結婚，並育有一子，但2015年拍攝《葛咸城》（Gotham）期間，她卻撻着拍檔Ben McKenzie，更懷上對方的BB，事後才申請離婚，令外界嘩然，認真敢愛敢恨！二人最終於2017年成婚，婚禮選在Ben 38歲生日當天舉行。
唔想聽廢話
本身並非漫畫迷的Morena，卻與超級英雄非常有緣，分別參演漫威電影《死侍》，以及DC世界蝙蝠俠前傳電視劇《葛咸城》，被問到想要甚麼超能力時，她笑說：「我想有截斷其他人廢話嘅超能力，而唔會因為咁而承受惡果。」Morena為自己的堅強個性感自豪，並說：「要學識唔好將所有嘢睇成關自己事，順其自然。當然，你都會有唔開心嘅時候，例如畀人炒，或者有人話你唔適合個角色，因為你頭髮唔係金色，或者你屁股唔夠大，或者你對腳唔夠苗條，咁你嘅心情又點會唔受影響呢？不過呢啲只係其他人嘅意見，你唔可以信晒所有嘢。」
雖然今時今日女性地位抬頭，但Morena認為作為女人還是受到壓逼：「你嘅身體、思維同講嘅每一句說話，所有部分都會被針對。一個壞男人會被視為性感，但一個壞女人，或者一個只係做自己想做嘅事嘅女人，就會被視為淫婦或者被歧視！」
巴西X美國 享受文化衝擊
意大利裔的Morena在巴西出生，7歲時移居美國，因而接受多元文化洗禮，她說：「我有個內在嘅文化衝突，我有非常巴西嘅一面，好掛住當地食物同文化，亦有非常美國嘅一面，好鍾意呢度嘅體制同可預測性。我覺得我嘅動力同抱負比較美國，而我熱情同慵懶嘅一面就完全係巴西。」
文：外娛組