鬚Look城城嚇親囡囡心噏！
天王郭富城前晚以西裝官仔骨骨造型出席活動，表示現忙於在美國拍攝一套在唐人街取景的電影，故要為角色留鬚，但他笑言囡囡Chantelle隔了個多月再見他，被其留鬚造型嚇親：「佢見到我有少少驚，搞到我有啲心噏，不過相信等佢大個就會明白爸爸係為藝術而犧牲。」他又笑言留鬚造型不舒服：「因為個感覺要好粗獷，個角色係不修邊幅，喺美國拍戲嘅時候好舒服，但返到香港回到現實生活就好唔慣，好想剃咗佢。」
未識叫爸爸
講到電影內容，城城透露以父女親情為主題，雖然過往曾數次飾演父親角色，但每次都是新挑戰：「戲入面我個女成廿幾歲，同我現實生活唔同。」問到做了爸爸後是否更易處理父親角色？他表示不一樣，因角色是在外地生活的點心師傅，為演活角色，他更特地向點心師傅學藝：「我依家連月餅都識整！味道唔錯（口架）！個樣都睇得吓，其他好似蝦餃、叉燒包都難我唔到。（有冇畀太太方媛試過？）屋企人未有機會試，我啱啱返嚟。」
講到太太早前在社交網站分享囡囡已識得叫媽媽，問囡囡識叫爸爸未？城城笑說：「邊有咁快。」而他今次短暫回港後很快又要出發到紐約拍戲，問到父親節不能在港度過會否可惜？他說：「冇辦法，要返去拍戲，好在係拍得開心，同好多實力派演員合作。」
文：音樂組