陳貝兒失婚再覓愛：想有個依靠！
做慣主持的陳貝兒向來予人「女強人」形象，但其實是戀愛大過天，甘願為愛情放棄事業。雖然面對婚姻失敗，但她仍然相信愛情，沒有放棄再尋找真命天子。
陳貝兒早前爆出與結婚六年的圈外老公黃國棟離婚，雖然雙方試過挽救，但最後因性格不合而分開：「係可惜嘅，但都係隨緣！適應緊一個人生活，樣樣嘢都要靠自己去做，不過香港女仔都硬淨，冇話唔可能。」單身的她直言獲不少朋友積極介紹男仔認識，現時擇偶最重要與另一半溝通到：「又唔係未試過！依家清楚自己要啲乜，外表冇所謂，矮都得！最重要溝通到、舒服。做女人係想有個依靠，但有時都係要靠自己，要識令自己開心。」
願為另一半棄事業
雖然外表十足「女強人」，但講到愛情的話，貝兒絕對是位戀愛大過天的女性！她笑言要澄清做主播時見她穿褲子、樣子剛強，但內心卻可以為愛情而放棄事業：「我係愛情至上！女人對愛情成件事係有憧憬，我到呢刻都相信愛情！為另一半我可以放棄事業，但要睇對象可唔可靠，唔可以被愛情沖昏頭腦。我係家庭行先，想組織家庭。」坦言已經結過一次婚，第二次要揀得對。
客串拍劇有新鮮感
感情上有轉變，工作上亦有新嘗試，貝兒首次客串拍劇《再創世紀》，獲林嘉華教做戲，她直言拍劇好新鮮及好玩：「做主持要凸顯個人風格，同一句說話，唔同司儀表達都唔同；拍劇就要縮小自己性格，擺低自己投入新角色，做主持就要好流利咁講晒啲稿，反而做戲唔係要流利，要有停頓同呼吸位，要活化同有感情喺入面，我都難掌握。」
文：專案組