地中海預支蜜月卓韻芝9‧15趁得閒結婚
藝人卓韻芝（阿芝）今年二月在新書中宣布閃嫁拍拖僅幾個月、從事電影美術工作的男友梁子賢。早前跟未婚夫到地中海馬爾他預支蜜月的她，昨日透露婚禮定於9月15日假中環外國記者會舉行，由她外婆擔任證婚人，宴請陪住她長大及愛錫他倆的親友出席見證。
阿芝透露未來奶奶選了幾個好日子，而揀9月15日全因「得閒」：「我同佢都唔使開工，大部分朋友都喺香港。不過最搞笑係唔知可唔可以搵已婚閨蜜做伴娘，我同朋友好似阿茂與阿壽咁傾咗成個下晝。」雖然她作風前衞，婚禮想較Free Style，但向長輩斟茶及過大禮等傳統禮節會做足。現時最大挑戰是減肥，她說：「必須為婚紗而付出囉，婚紗好鬼窄、好難着，希望到時可以精神又瘦瘦哋，唔好嚇親大家。」她又稱得未婚夫支持，婚後仍會繼續寫作及搞Talk Show。