陳瀅飛羅天宇：換畫換咗四次！
羅天宇與湯洛雯兩個月前爆出分訊，即被指火速搭上女方好姊妹陳瀅。緋聞情侶雖然齊齊出活動搵真銀，不過玩遊戲時故意玩到「離行離迾」，尷尬到出晒面，曾堅稱是朋友的二人，更雙雙表示久未見面，活動之前誇張到偈都唔傾！
因拍攝無綫劇《愛˙回家》而結緣的「靚湯」湯洛雯和羅天宇四年情玩完，雖然雙方都強調是和平分手，但有指家底不俗的他被陳瀅看中，更被影到齊齊去大牌檔撐枱腳，加上陳瀅曾稱是透過湯洛雯認識羅天宇，令緋聞更加傳到似層層。
耐冇見冇偈傾
這對緋聞情侶昨日孖住出席《新港城中心×TAMIYA「足球越野車大對決」揭幕禮》，二人在大會安排下進行多個遊戲，但明顯表現生疏，所有的身體接觸都是點到即止。即使要面貼面傳波仔，下身都隔開成呎遠，陳瀅要在對方手臂畫畫時，要主持人出聲才敢輕托羅天宇手臂。問他們是否故意避忌？二人均表示只因很久沒見，陳瀅更直指：「我都覺得自己有啲尷尬，呢兩、三個月都拍劇，出番嚟見人好唔慣。」羅天宇則說：「係囉，佢好似失咗蹤咁。（覺得尷尬？）未知呀，仲未同佢傾偈。」
嫌太強壓力大
羅天宇和陳瀅又數次強調不是拍拖，亦沒有互相了解中，陳瀅笑說：「唔係喇，好舊嘅事，我換畫都換咗四次！講緊拍戲嘅角色啫，嗰陣我哋拍戲演情侶，到依家我都換咗四次角色喇。」羅天宇則自爆沒有心情想感情事：「最近心情麻麻，屋企遇上兩次意外，媽媽煞唔切車撞上人哋度，好彩人冇事。另一次係我架車畀人刮花。」再問陳瀅是否他喜歡的類型時，他笑說：「太強喇，好大壓力，佢咁多Fans。」陳瀅扮嬲：「乜我個勢真係好惡？」羅天宇就說專注工作先。
文：音樂組