Rosemary向老公開火感情瀕決裂

向來渴望有小朋友的Rosemary，與老公努力年多後終於成功造人，但想不到卻令夫妻感情起變化！懷有五個多月身孕的Rosemary表示懷孕後，老公變成「緊張大師」，樣樣都嗌禁止：「我同Jason性格好唔同，可謂一凹一凸，好多想法都唔同。好似我有咗，好想向大家宣布分享喜悅，但佢就想低調，覺得家人知就得，去到五個月唔可以再隱瞞先畀講！佢又超級緊張，我哋去迪士尼玩，有小小刺激遊戲佢就話孕婦唔玩得，但對我嚟講呢啲遊戲好小事。」

改變相處 雨過天青

小事以為化無，其實只會日積月累，更令夫妻關係變質，Rosemary直認懷孕初期過得很辛苦：「可能因為身體賀爾蒙變化，整個人變得好敏感，小小事都好火、好暴躁！我成日會向老公發脾氣，醫生話個情況都好常見，最好方法盡量唔好令到我唔開心，所以我同老公嗰段時間有啲問題。（因咩事？）好似我平時要早瞓，但佢好夜返屋企，返到嚟仲會喺房睇電視、玩電腦，我就會唔開心，覺得佢嘈住我瞓覺，跟住我就會好嬲，覺得佢好自私。（點解決？）依家佢轉變咗好多，佢去另一間房睇電視唔騷擾我。」Jason為令老婆心情平靜，亦出盡法寶，Rosemary說：「依家關係好好，佢每日都會打好多電話畀我，又不時問身邊啲媽咪朋友意見，解釋畀佢知我點解會咁樣。每次見醫生佢都會陪我，了解生BB每一個過程，所以到時一定會陪我入產房。」

Rosemary指懷孕後變得敏感，小小事都發脾氣。	Rosemary與老公因懷孕出現分歧，幸好經溝通後已雨過天青。	Rosemary暫時停做高難度的瑜伽動作，以防萬一。

棄做高難度瑜伽

Rosemary懷孕初時仍做倒吊等高難度動作瑜伽，但她表示醫生不建議再做：「因為有啲動作對身體唔好，如果做太多Upside Down，BB愈來愈大，個盆骨位驚定形，變得好大，以後好難收番，所以我依家一星期教一堂瑜伽，但就唔會親身做，只係指導吓學生嘅動作。」

文：專案組

場地：Caviar House & Prunier