黃秋生躁底變隨和嚇親屋企人
影帝黃秋生早前成功千里尋親，與兩位同父異母的哥哥相認，受到哥哥以家人為首的理念影響，秋生自言性格由暴躁變得隨和，卻令家人及親友感到不自在，笑言連與朋友搭膊頭閒聊，也擔心被誤會為HeHe：「依家對自己都產生恐懼，唔知應該用乜嘢語調同外間溝通！」
早前秋生成功越洋尋得兩位同父異母的外籍哥哥並在港見面，共度幾日快樂時光，短短的相聚，想不到令秋生性格徹底改變：「一個家嘅根，兩個阿哥畀我感覺成日都提Family Come First。（睇法改變？）好抽象，會將我一直以來孤獨脾性擺低咗，照鏡都覺得自己唔同咗、平和咗好多，以前好易忟憎，依家忟之前會諗一諗。」
搭膊頭驚被指HeHe
秋生笑指此舉嚇親老婆及兩子，朋友對其改變亦大感費解：「愈隨和愈驚，有時搭吓人膊頭，人哋又驚我基，搞到唔知點同人講嘢好，但我真係做唔番以前；喺老婆面前就係Yes Man，佢問我點解咩都話係同認同，兩個仔就點我、同我講道理，佢哋似老竇多啲，有時都嬲o架！但發完脾氣後，佢哋會打番嚟叫我唔好咁細路。」
有意去外國接Job
近日秋生忙於籌備構思10年、將於暑假公演的原創舞台劇《夕陽戰士》，飾演靈魂人物老師一角的他身兼藝術總監、編劇及演出幾職，精挑細選鄧智堅、邱頌偉及張銘耀等舞台劇演員參與，眾人與前輩合作大感壓力，擔心會拖垮秋生！秋生就大派定心丸，表示重點是享受過程，而非成功與否，有雜念只會徒添痛苦。而故事內容提及保家衞國，秋生自言男人遇上困難走到最前線絕對正常。
完成舞台劇後，秋生有意籌備音樂劇及接拍外國劇，去英國或美國演戲，學到嘢之餘英語亦會進步。以前他試過在英國拍劇，工作模式、環境都舒服：「喺香港都冇嘢做，冇人夠膽搵我，無謂令人恐懼啦！」
文：影視組
攝：劉斌
場地：高興happinesssss
化妝：Jolinn Ng、Betty Wen
髮型：Ray Mork & Taky Chung @ Fifth Salon
服裝：bauhaus