曾與梁焯滿於三級片有不少對手戲的梁敏儀與林雅詩，昨日接受電話訪問時，異口同聲表示不知梁焯滿患病。梁敏儀說：「你自己問佢，其他人嘅嘢唔方便講。（對上一次幾時見過佢？）兩個月前，佢仲特登請我BBQ話慶祝我生日。（當時佢有冇異樣？）男人畀人感覺好強，有咩嘢都唔會講，佢嗰日都冇乜嘢，照常食嘢飲嘢。（戒口？）冇。」問到會否慰問梁焯滿？她坦言：「朋友有啲事係在心中。」
林雅詩亦表示數月沒見梁焯滿，不覺對方身體出問題：「之前大家一齊喺長洲拍嘢，佢仲好玩得同講笑。（有冇瘦到？）佢不嬲都瘦嘅，但近排真係冇見，所以唔知。如果佢有需要會搵我幫手，我都一定會幫。」