佘詩曼鍾情熟男嫌小鮮肉冇經驗

藝人佘詩曼、黃依汶、梁靖琪（Toby）、周家蔚、名模樂基兒和周汶錡等昨晚出席眼鏡品牌活動，早前被指感染寨卡病毒的阿佘以「Pink Lady」造型現身。她透露已病愈，並否認感染病毒：「冇咁嚴重，只係嚴重嘅感冒，成身都好痛，攤喺屋企郁唔到，自己都好驚。當時喺香港，擔心返唔到工，屋企人有照顧我，日日食粥。（屋企人叫你唔好咁操勞？）我自己都抓晒頭，唔知點解咁。不過冇入院，但有睇醫生，醫生話可以入院，但我覺得屋企舒服啲。」

「生活得好開心」

問到身體不適時可有想過被男士照顧？阿佘表示：「冇諗喎，只係諗幾時好同好唔好得番。（好姊妹Toby有拖拍，叫佢介紹男仔畀你？）佢嗰啲太細個，唔啱我。（鍾意成熟型？）要溝通到。（有冇小鮮肉追你？）冇留意。（接受姊弟戀？）冇話唔接受嘅，未試過，但畀我揀，我未必會咁選擇。」她又稱：「兩個人一齊溝通到，有方向就得，但太細個人生經驗唔豐富，可能話題冇咁多。（揀番呢行？）隨緣啦。（最近好Dry？）生活得好開心。」

戴黑超的周汶錡星味十足。	樂基兒露腰出席活動。	周家蔚（左起）、佘詩曼及梁靖琪情如姊妹。

現正跟紋身小鮮肉男友Jon打得火熱的Toby低胸現身，甜笑透露已拍拖一段時間。離婚四年的她被問可有再婚打算？她坦言：「都想，係有呢個打算，每個女仔都會想，但睇定啲先，太快喇，順其自然。（對方係真命天子？）佢好好，我都希望係，我哋有好多共同嗜好。（融入你朋友圈？）雙方都有。」

黃依汶囝囝似女仔

同場的黃依汶表示老公陳國坤昨日首次單獨帶囝囝陳真出街：「個仔開始大，識講嘢，老公應該同佢交流多啲，佢成日覺得個仔似女仔，會扭計。」她又指老公很怕帶兒子出街，因為要拿一個很大的奶粉袋，不過陳真已經長大不少，現時拿一包零食、兩支奶就可以出街。提到其前男友余文樂剛榮升父親，黃依汶大方祝福：「我知道，恭喜佢，呢個係好夢幻嘅時刻，希望佢享受呢個奇妙時刻。」

文：專案組