李美慧閃嫁曾文豪 曾昭亮唔敢嗌媽咪
2006年落選港姐、現年31歲李美慧（原名李斯庭），昨日為《深宮計》宣傳，透露已入紙排期，將於6月在港下嫁大25年的56歲富商曾文豪，問到相識經過？她說：「朋友介紹識，拍咗拖半年，算閃婚，拍完《深宮計》就識咗佢。（雙喜臨門？）唔係。」提到曾文豪家底豐厚？李美慧說：「我識佢嗰陣唔知。（婚後做少奶奶？）佢有叫我唔好做嘢，會尊重佢意見，揀工作做。」而在《深》中與李美慧有不少對手戲的陳煒，直言戥這位「近身」開心：「恭喜咗佢，仲叫佢請我飲添！佢好乖又叻女，多才多藝！」
至於曾文豪二女曾昭亮昨晚出席活動時，表示初得知婚訊感震驚，對同齡後母稱呼感疑惑，她說：「好戥Daddy、媽咪開心。吖，唔係媽咪。（Auntie？）都唔係，佢同我一樣大o架，我哋溝通好好。（若爸爸再生小朋友如何？）歡迎，冇所謂。」
