張偉文彈秋官阿姐唱法冇變Albert急補鑊
區瑞強及張偉文兩位「靚聲王」難得聚頭，但鬥唱前先鬥爆料，自認「好直」的張偉文語出驚人，揚言不明為何鄭少秋、汪明荃組合可「唱到咁耐」，又指羅文是「梗頸四」，還大爆有上位歌手恃「紅」生驕，教而不善激爆老前輩。
「民歌天王」區瑞強（Albert）將於5月11日起，假伊館舉行一連三場《區瑞強粵唱越經典演唱會》，日前相約交情逾40年的好友張偉文（Donald）擔任其電台節目嘉賓。Albert直言欣賞Donald的唱功，亦欽佩其直率性格：「冇人夠膽講，佢都照講。」又指一直等Donald一起開靚聲王演唱會，但覺得樂壇少有成功的男男組合，不似鄭少秋（秋官）配汪明荃（阿姐）可長存，Donald「爆seed」說：「我覺得，佢哋點解可以唱咁耐囉！幾十年都係不變嘅唱法。」嚇到Albert急急打圓場，再問Donald是讚還是彈？他就話：「梗係讚啦，如果唔係佢兩個人點會咁好聽呀！」
羅文唔識唱和音
Donald曾是已故巨星羅文的和音，大讚亡友雖不接受批評，但肯改變：「佢嗰個『梗頸四』唱法，我同佢講過之後，真係冇咗（唱）《小李飛刀》聲。羅文好多金句o架，佢曾經同我講話自己唔識唱和音，因為佢唔識走音。」而Albert亦分享了一段跟羅文的趣事：「嗰次請羅文做電台嘉賓，佢詐型問點解要唱咁耐，點知唱咗三個鐘，我話節目完要播新聞，羅文話要繼續唱，叫我Cut咗新聞，我話唔得，佢就嬲嬲哋咁走咗。」
爆後生仔唔聽教
對於一眾樂壇後輩，Donald大爆現時當紅歌星的一段黑面往事，指當時該歌手剛冒起，被邀到無綫綜藝節目唱古裝劇主題曲：「呢啲歌係一時快一時慢，佢唱錯晒，有老前輩教佢點唱，點知佢仲同人Chur，激到老前輩好嬲！」當時Donald任和事老勸前輩：「孺子不可教，就唔好教啦。」據他所知事後沒有人道歉，自言也做過後生仔，錯了一定說對不起。
文：音樂組