黃心穎想換車搶家姐飯碗

藝人黃心穎前晚以司儀身份主持「全新第六代BMW M5發布會」。心穎原來本身十分喜愛車,透露最近打算換新車:「想換一架跑車,我好捨得用錢喺車度。」又自言想試吓玩賽車:「有人叫過我玩,自己都心郁郁想試,因為我覺得好有型,但要睇吓有冇時間。(男友馬國明畀唔畀?)嘿!有啲嘢唔使過問o架!唔知畀唔畀,哈哈!」

問到是否趁家姐黃心美出埠拍劇而接埋對方的工作?心穎笑說:「司儀平時都有做,但係冇家姐咁多。搵食艱難啫!咩都要做吓啦!做司儀的確有好好收入,又可以練口才。(家姐喺主持方面有勁敵喎!)不嬲都有o架啦!佢搵得多過我喇,佢密做呀嘛!我反而覺得有時啲人係想請我哋是但一個,佢唔得閒就畀我接埋囉,佢啱啱去咗拍戲,有排都未返嚟喇!等我接多啲司儀嘢做先,有錢齊齊搵。」