林偉忍口喪Gym食撻要配給

林偉近年在劇集《不懂撒嬌的女人》及《城寨英雄》中為人注目，亦有份參演《飛虎之潛行極戰》及《使徒行者2》等作品，當中以「打男」角色居多，但他坦言只是公司及監製安排。談及經常中、港兩地走，拍劇、登台及商演等，問到喜歡在內地拍劇還是本地，他說：「內地投資者資金好多，有好多工作人員，我哋只係專注做好演員，你坐低有好多人幫你抹汗同補妝，又幫手拎飯，又有車接送，香港可能工作人員少，硬件有差別。」

促進新陳代謝

入行多年的林偉保養得宜，身材經常保持最佳狀態，原來他的凍齡秘訣是做運動：「做有氧運動，最緊要多啲流汗，流多啲汗新陳代謝會好。平時視乎時間同工作去健身室，有時會喺屋企做運動，或者喺屋企附近跑步。」

曾膽固醇過高

運動做到足，但講到飲食，林偉卻不會戒口，只會量力而為：「我後生會食足百分之百或者百分之八十，但依家會食百分之四十，如果好鍾意食就百分之五十。（忍到口？）忍到，見到朋友糖尿、膽固醇高，我自己都驚驚哋！（做身體檢查？）正常，試過五、六年前膽固醇高咗啲，以前太鍾意食蛋撻，下午茶食蛋撻飲咖啡奶茶，隔日就去。嗰陣後生，冇乜警覺性，依家蛋撻都係一個月食一個咋！」

放大圖片	林偉以多種運動保持體態，務求以最Fit狀態上鏡。	劇接劇的林偉（右），孖住吳家樂及王君馨宣傳《城寨英雄》。

文：專案組

攝：司徒國榮

場地：A Plus Fitness