「百萬女郎」Peggy Rose密謀組隊煮力搶觀眾
亞視斥資過千萬元購買版權的新版《百萬富翁》，除有陳志雲力撐大局外，還有兩位吸睛的「百萬女郎」邱雅雯（Peggy Cash）和秦芷瑤（Rose Money）做左右手，令到節目生色不少。面對大師級陳志雲，她們覺得對方友善又有急才，因而受益不少。她們更希望可以組成組合出擊！
本身是模特兒出身的Peggy說：「志雲係好勤力嘅人，臨危不亂，我喺佢身邊學到好多執生技巧，最重要學到佢嘅工作態度，每次拍攝前，見佢喺化妝間度努力背稿，好認真，但出場時又見佢可以好輕鬆，仲會臨時爆肚，呢啲真係有排學！」
而當演員的Rose則覺得與志雲的接觸跟想像很有分別，她說：「之前以為佢好嚴，但合作後其實好和藹，呢位前輩仲提點我唔好緊張，教我點應對每個唔同環節！」
齊齊出絕招
除了當「百萬女郎」外，她們都有共同目標，是希望公司可以安排拍劇或演出旅遊、飲食節目等，以組合發展更好，Peggy笑說：「我嘅強項係扮靚、養生，閒時會玩瑜伽同煮嘢食，又鍾意去旅行，所以好多節目都好啱做！（平時最鍾意煮嘢食畀男友？）我係工作至上，公司剛剛開台，老闆同香港人對亞視都好大期望，如果人哋話食物可留住男人個胃嘅話，我想留住觀眾個胃先！」而Rose則稱最愛煮甜品，笑稱準備為Peggy整生日蛋糕，認真姊妹情深！
文：影視組
場地：帝醇酒莊