張美妮謀後路轉行教瑜伽

藝人張美妮入行多年，雖然已嫁得好歸宿，但對演戲仍有熱誠，於劇集《逆緣》中與視帝黎耀祥有不少對手戲，說到與這位好戲之人合作，她說：「其實同祥哥十年前曾經一齊拍過廣告，不過講到拍劇就真係咁多年都未試過，記得拍呢套劇第一場單對單嘅對手戲時，面對佢我都好緊張，不過祥哥話：『唔係呀！幾好呀！』佢畀到好大信心我，同佢合作真係學到好多。」

被摸感尷尬

美妮指之前於劇集《巨輪II》中與視后田蕊妮做好姊妹，合作得很舒服，對方懾人之力更觸動到她：「記得嗰場戲講我畀人拋棄，佢安慰我，拍嗰陣佢一掂我，我已經觸動到想喊。呢啲就係阿田同祥哥嘅魅力，希望自己有朝一日都可以成為咁嘅演員。」

於《逆緣》中，美妮有一場被演員黃栢文借推金催運博懵的戲份，拍攝時美妮要露背、露腿，只摟着毛巾，第一次拍這類場口的她坦言有少許尷尬：「導演拍之前都打畀我，我話冇問題，可能佢哋知我結咗婚，點都要同老公講聲，但最終我都冇講到。（拍時有否尷尬？）初時都唔覺，但栢文哥隻手摸落嚟時，始終人係有體溫，都有少少唔知點，而且嗰場戲講祥哥闖入嚟，所以要就鏡頭拍咗好多次，不過栢文哥都好有禮，事後猛話唔好意思，我就話冇問題，大家專業。」

獲老公支持

除了拍劇，已做了十年瑜伽的美妮表示積極考瑜伽導師牌，希望可開瑜伽中心，更笑言今次沒有被老公潑冷水。她說：「始終做演員係被動嘅，都諗緊有乜嘢自己鍾意又可以做，之前學結他、鋼琴，但半途而廢，畀老公笑我三分鐘熱度，但今次佢好支持我，我都想挑戰吓同畀個目標自己。」

文：影視組

攝：鄭家俊

化妝：Jun　

髮型：Hei

場地：美國餐廳