海俊傑遇新星擺款出口贈兩句
入行24年的海俊傑見盡世面，北上工作6年的他分享在內地的見聞，大爆有些年輕的內地當紅演員十分大牌，雖然演技出色，但不尊重他人，令他忍不住出口「提點」對方！
現年45歲的藝人海俊傑於1994年參加新秀入行，其後簽約華星，之後亦分別簽過無綫及亞視，拍過不少劇集。近年他把工作重心轉移內地，拍攝劇集及網絡電影，他分享在內地工作的所見所聞，坦言當地製作團隊其實挺喜歡用香港演員，皆因有職業操守及禮貌，更不點名大爆有些新一代的內地當紅演員十分大牌：「有一次全部人攞住劇本圍埋對戲同練排位，女主角一號就坐喺度唔郁，其實佢有嘢要郁，咁我唔會鬧人，但就贈一贈佢，話『你啱啱排嗰陣係企定坐o架？我唔係好記得。』佢就即刻彈起身。其實佢哋係專業嘅，台詞、喊都做足，但就唔尊重大家。」
自認低能有情趣
問到北上工作6年，賺夠「人仔」置業未？海俊傑坦言在北京租住物業，笑言待生仔後才買樓：「老婆同我都恨生，見到細佬妹個個都生，我都要生o架啦。佢哋話年紀大會冇力同小朋友玩，但其實我唔係好認老，我一星期做五日運動。（計劃幾時生仔？）一年後啦，但要睇上天安排，唔係話有就有。」去年結婚的他亦大方分享夫妻相處之道：「結婚真係一生一世，好多時啲人話冇愛、冇Passion（激情）就離婚，但其實呢啲係要自己創造，例如生日同節日係要刻意安排驚喜，唔係話老夫老妻就唔使做。同埋我哋好低能，就算到六、七十歲我哋都依然會係咁，係Keep住兩個人嘅情趣。」
重返香港樂壇
婚姻生活美滿，工作方面海俊傑亦有新動向，最近簽下新公司的他宣布重返香港樂壇，將推出廣東及國語歌。他坦言這幾年都有唱歌，直至去年婚宴重遇昔日老闆陳欣健，才成功拉攏他簽新公司：「完咗婚宴我同佢講想唱番歌，佢就話搵日食飯，仲介紹咗依家個老闆畀我識。」他表示正在揀歌，今年會兼顧唱歌及在內地拍戲，更透露之前上無綫節目《流行經典50年》，見番同屆新人獎金獎得主古巨基：「我係銀獎，如果有埋曹永廉，我哋金銀銅得主就齊晒。」
文：音樂組
攝：吳文聰
場地：秋澗爐端燒